| [1] | et recongnurent les dictes parties, chascune en droict soy, de leurs bonnes voluntez et certaines sciences, sans aucune fraulde, force, erreur, contraincte, lesion et decepvance, et pour le cler et evident prouffict d'une chascune partie, siconme ilz disoient, avoir faict, traicté et accordé entre eulx et l'une partie avec l'aultre l'adcensement a sens etconvenances quy ensuivent, c'est assavoir lesdiz Pierre, Sanceline, Phelippot et Cedelle eulx avoir acensé et a tiltre d'acensement baillé, quicté, transporté et delaissé a droict croix de cens ou rente annuel ou perpetuel ausdiz Raoul et Jehenne, sa femme, et iceulx Raoul et Jehenne, sa femme, avoir pris et retenuz d'iceulx bailleurs, a tiltre d'accenssement a droict de croix de cens ou rente, comme dict est, des maintenant a tousjours perpetuellement, une maison toute sicomme elle se comporte et extend de toutes pars, en long et lé, hault, bas, devant, deriere, avec toutes ses veues, droictz, appartenances et appendences quelzconques, que lesdiz bailleurs, a cause de leursdictes femmes, se disoient avoir par indivis du propre heritaige de leursdictes femmes, assiz a Paris, en la rue de la Charronnerye, devant les murs du cimitiere Sainct Innocent, tenant, d'une part, a une maison qui est Jehan Bavon et, d'aultre part, a Thibault de la Nasse, abboutissant par deriere a la maison Jacques l'Escuier, en la censive du roy nostredit seigneur et de l'evesque de Paris, chargee icelle maison et ses appartenances avant ce present bail et accensement en six livres paris. tant pour fons de terre que pour croix de cens ou rente, dont cent solz paris. de rente sont deubz aux religieulx de Sainct Magloire de Paris egallement par les quatre termes a Paris accoustumez, et vingt solz paris. quy sont deubz aux religieulx de Sainct Victor de Paris a deux termes en l'an, c'est assavoir dix solz paris. a la Sainct Jehan Baptiste et dix solz a Noël, c'est assavoir ce bail, prinse et acensement faictz pour et parmy le pris de trente huict livres paris. de croix de cens ou rente annuel et perpetuel sur le tout et pour toutes charges, comptez et comprins dedens lesdictes six livres paris. de premiere charge, que lesdiz preneurs en gaigerent, promisrent et seront tenuz rendre et payer, chascun pour le tout, par eulx, par leurs hoirs et par ceulx quy auront cause d'eulx, c'est assavoir les six livres paris. de premiere charge ausdiz religieulx et par lesdiz termes quy leurs sont deubz chascun an, et trente deux livres paris. ausdiz bailleurs, a leurs hoirs et a ceulx quy auront cause d'eulx, chascun an esgallement par les quatre termes a Paris accoustumez, c'est assavoir a chascun desdiz mariez bailleurs, a cause de sa dicte femme, seize livres paris., a commencer a payer ladicte rente par lesdiz preneurs a la Sainct Remy prochainement venant pour le premier terme, et pour et parmy la somme de trente livres paris., forte monnoye courant a present, pour et en nom d'amendement, aux us et coustumes de la ville de Paris, que lesdiz preneurs en faisant ledict acensement avoient promis mectre ou faire mectre et emploier du leur en ladicte maison et appartenances ; (Chartes Abb. St-Magl. T.F., t.3, 1330-1436, 271) |
|
|
Attestation de 